नेपालगन्ज उपमहानगरपालिका वडा नं. ११ स्थित त्रिभुवन चोकमा विद्युत् आपूर्तिलाई थप भरपर्दो र प्रभावकारी बनाउन पुरानो २०० KVA ट्रान्सफर्मर हटाई ३०० KVA क्षमताको नयाँ ट्रान्सफर्मर जडान गरिएको छ।
ट्रान्सफर्मर जडान कार्य इलेक्ट्रिसियन, सुपरभाइजर, इन्जिनियर तथा एकाउन्टेन्टको प्रत्यक्ष उपस्थितिमा सम्पन्न भएको हो। यसबाट क्षेत्रको बढ्दो विद्युत् लोड व्यवस्थापनमा सहजता आउने र बारम्बार हुने विद्युत् समस्या न्यूनीकरण हुने अपेक्षा गरिएको छ।
यसै क्रममा उपस्थित इन्जिनियरले हालै वडा नं. ७ मा भएको आगलागीको प्रसङ्ग उल्लेख गर्दै अव्यवस्थित रूपमा तानिएका WiFi/इन्टरनेटका तारहरू पनि आगलागीको जोखिम बढाउने कारण बन्न सक्ने जानकारी दिनुभयो। उहाँका अनुसार यस विषयलाई गम्भीर रूपमा लिँदै सम्बन्धित इन्टरनेट सेवा प्रदायकहरूसँग आवश्यक समन्वय तथा छलफल भइरहेको छ, ताकि भविष्यमा यस्ता जोखिम न्यूनीकरण गर्न सकियोस्।
स्थानीयवासीलाई पनि विद्युत् पोलमा जथाभावी तार नतान्न, अव्यवस्थित तारहरूको व्यवस्थापन गर्न र विद्युत् सुरक्षाप्रति सचेत रहन आग्रह गरिएको छ।
