बाँकेको खजुरा गाउँपालिका–२ मा स्थापना गरिएको “खजुरा बाल संरक्षण गृह” को उद्घाटन समारोह अत्यन्त भव्य, सभ्य तथा ऐतिहासिक रूपमा सम्पन्न भएको छ । नेपाल युवा क्लब बाँकेको पहलमा स्थापना गरिएको उक्त संरक्षण गृहले अब असहाय, अनाथ तथा संरक्षण आवश्यक भएका बालबालिकाको सुरक्षित भविष्य निर्माणमा महत्वपूर्ण भूमिका खेल्ने विश्वास लिइएको छ ।
सोमबार आयोजित विशेष उद्घाटन कार्यक्रममा विभिन्न राजनीतिक व्यक्तित्व, समाजसेवी, बुद्धिजीवी, पत्रकार, सुरक्षाकर्मी, युवा तथा स्थानीयवासीहरूको उल्लेखनीय सहभागिता रहेको थियो । कार्यक्रममा वक्ताहरूले समाजमा संरक्षणविहीन बालबालिकाका लागि यस्तो कार्य अत्यन्त उदाहरणीय र प्रेरणादायी भएको बताएका थिए ।
कार्यक्रममा बोल्दै आयोजक संस्थाका प्रतिनिधिहरूले “हरेक बालबालिकाले सुरक्षित आवास, शिक्षा, स्वास्थ्य र माया पाउने अधिकार राख्छन्” भन्ने मूल उद्देश्यका साथ संरक्षण गृह स्थापना गरिएको जानकारी दिए । साथै आगामी दिनमा बालबालिकाको उज्ज्वल भविष्य निर्माणका लागि अझ व्यापक सामाजिक अभियान सञ्चालन गरिने प्रतिबद्धता समेत व्यक्त गरिएको थियो ।
उद्घाटन समारोह उत्साहपूर्ण वातावरणमा सम्पन्न भएको थियो भने उपस्थित सम्पूर्ण अतिथिहरूले संस्थाको सामाजिक अभियानको खुलेर प्रशंसा गरेका थिए । कार्यक्रममा विभिन्न व्यक्तित्वहरूद्वारा शुभकामना मन्तव्य, सहयोग प्रतिबद्धता तथा सामाजिक एकताको सन्देश प्रवाह गरिएको थियो ।
नेपाल युवा क्लब बाँकेले कार्यक्रम सफल बनाउन सहयोग गर्ने सम्पूर्ण सहयोगी हातहरू, अतिथिगण, पत्रकार, सुरक्षाकर्मी तथा स्थानीयवासीहरूप्रति हार्दिक आभार व्यक्त गरेको छ ।
